Сулайманов өзүнүн ыйгарым укуктарынан баш тартуусу «жакшылап ойлонуп» кабыл алынган чечим экенин белгиледи. Ал дайыма шайлоочуларынын актуалдуу маселелерин көтөрүүгө жана алардын кайрылууларына жооп берүүгө аракет кылганына көңүл бурду.
«Менин мандатым ар дайым менин ар-намысымдан, репутациямдан жана элдин биримдигинен жогору тура албайт. Коомдогу кырдаалды курчутпоо үчүн мен депутаттык кызматтан кетүү чечимин кабыл алдым», — деп жазды ал.
Ошондой эле мурдагы депутат видеодо пайда болгон адам менен тааныш эместигин жана ага эч кандай басым жасалбаганын белгиледи.
«Мен бул кырдаалды тынчтык жолу менен, конфликттерсиз чечүүнү өтүнөм. Болгон окуяны саясий мүнөздө карабашыбыз керек», — деп кошумчалады ал.
Сулайманов шайлоочуларына ыраазычылык билдирип, парламентте анын ордун ээлеген талапкерге ийгилик каалады.
Эскерте кетсек, буга чейин Борбордук шайлоо комиссиясы Сулаймановдун чыгуу тууралуу билдирүүсүнө байланыштуу анын ыйгарым укуктарын убактылуу токтоткон.
