Иш-чарада өкмөт башчынын орун басары жана УКМКнын жетекчиси Камчыбек Ташиев катышты. Бул долбоордун алкагында жатакана, мечит жана колледждин тарбиялык корпусу капиталдык ремонттон өткөрүлдү.
Жаңы комплекстин максаты — спорт жана билим берүү тармагындагы мүмкүнчүлүктөрдү кеңейтүү, ошондой эле жаштардын ар тараптуу өнүгүүсүн камсыздоо. Комплекс күрөш залын, көрүүчүлөр үчүн трибуналарды, фудкортту, заманбап жатаканаларды, конференц-залды жана окуу-тренировка сабактары менен жыйындар үчүн атайын жайларды камтыйт.
Күрөш залы грек-рим жана эркин күрөш боюнча машыгуулар үчүн заманбап килемдер жана керектүү инвентарлар менен жабдылган. Мындан тышкары, бул жерде машыгуу залдары, адистештирилген спорттук жайлар жана жалпы физикалык даярдык үчүн кардио зона бар. Колледждин аймагында мечит да курулган.
Жаңыланган тарбиялык корпус билим берүү жана тарбия программаларын ишке ашырууга жардам берет, окуу процессин спорттук даярдык менен бириктирет. Жаңы медициналык блок жана санитардык бөлүм биринчи жардам көрсөтүү жана профилактикалык текшерүүлөрдү өткөрүү үчүн заманбап жабдуулар менен жабдылган.
Ачылыш салтанатында Камчыбек Ташиев бул комплекс чемпиондорду даярдоонун борбору гана эмес, жаштардын ар тараптуу өнүгүшү үчүн да орун болоорун баса белгиледи. Ал бул долбоор спортту, билим берүүнү жана ден-соолукты гармониялуу айкалыштырып, жогорку натыйжаларга жетүү үчүн бардык зарыл шарттарды түзөөрүн айтты.
