17-февралда Саламаттык сактоо министринин биринчи орун басары Айбек Маткеримовдун Германиянын өнүктүрүү банкы (KfW) өкүлү Индиря Молдогазиев менен GITEC-IGIP консалтингдик компаниясынын долбоор менеджери Керез Келишова менен жолугушуусу болду. Жолугушууда Германиянын финансылык колдоосу менен ишке ашырылып жаткан «Саламаттык сактоо V» сектордук программасынын жетишкендиктери жана учурдагы абалы, ошондой эле техникалык колдоо, маалыматтарды жаңыртуу жана медициналык мекемелерде системанын ишенимдүү иштешин камсыз кылуу маселелери талкууланды.
Бул жолугушуунун алкагында жабдууларды салтанаттуу тапшыруу өткөрүлдү — 150 принтер жана 1000 картридж медициналык мекемелерге жумуш процессин жеңилдетүү жана санариптик эсепти жүргүзүү үчүн берилди.
Саламаттык сактоо министрлиги бардык медициналык мекемелерде кызматкерлер үчүн окутуу семинарлары өткөрүлгөнүн жана SAMEDIS системасы ийгиликтүү ишке киргизилгенин билдирди. Региондордо медициналык жабдууларды инвентаризациялоо улантылууда, Бишкек жана Чүй облусунун мекемелери негизги этапты аяктап, маалыматтарды жаңыртуу менен активдүү иш алып барууда.
Мындан тышкары, маалымат базасы менен иш алып барган жана киргизилген маалыматтын сапатын көзөмөлдөгөн профилдик бөлүмдөрдүн кызматкерлери окутулду. Кийин медициналык жабдууларды эсепке алуу «Кыргызфармация» мамлекеттик ишканасы тарабынан жүргүзүлөт.
Айбек Маткеримов Германиянын өнүктүрүү банкы (KfW) жана GITEC-IGIPге көрсөтүлгөн колдоо үчүн ыраазычылык билдирди, мындай кызматташтык өлкөнүн саламаттык сактоо системасынын туруктуулугун жана натыйжалуулугун жакшыртууга көмөктөшөрүн белгиледи.
Долбоорду ишке ашыруудагы кийинки кадам техникалык колдоону уюштуруу жана саламаттык сактоо тармагында санариптик чечимдерди мындан ары өнүктүрүү болуп саналат.
