Ош жана Жалал-Абад облустарына болгон иш сапарынын алкагында Кыргыз Республикасынын саламаттык сактоо министринин биринчи орун басары Айбек Маткеримов Ош шаарындагы шаардык клиникалык оорукананын инфекциялык стационарын көрүп чыкты.
Визиттин негизги максаты — курч респиратордук вирус инфекциялары жана грипп менен ооруган бейтаптарга медициналык жардамды уюштурууну баалоо, ошондой эле сезондук оорулардын көбөйүшү шартында палаталардын жүктөлүшүн талдоо.
Текшерүү учурунда оорукананын директору Шаят Абдурахманов инфекциялык стационарда 270 орун бар экенин, анын 180и балдар үчүн, калган 90ы чоңдор үчүн арналганын билдирди. Сезондук оорулардын жогорулашы менен кайрылуулар саны өсүүдө, бирок бардык бейтаптарга зарыл медициналык жардам толук көлөмдө көрсөтүлүүдө.
Акыркы жылдары, анын ичинде административдик-территориялык реформа натыйжасында, Ош шаарынын калкы жана аймагы кыйла көбөйгөнүн белгилөө маанилүү, бул өз кезегинде медициналык мекемелерге кошумча жүк жаратат жана стационарлардын жогорку толтуруу деңгээлине убактылуу алып келет.
Визиттин жыйынтыгы боюнча Айбек Маткеримов бир катар конкреттүү көрсөтмөлөрдү берди. Атап айтканда, чоңдор үчүн альтернативдүү бөлүмдөрдө кабыл алуу уюштурууну, ал эми инфекциялык стационарды сезондук инфекциялар учурунда эң уязвимдүү категория болгон балдарга жардам көрсөтүү үчүн максималдуу деңгээлде пайдаланууну тапшырды.
Мындан тышкары, санитардык-эпидемиологиялык нормаларды сактоону күчөтүү, бейтаптарды так маршрутизациялоону, медициналык персоналдын үзгүлтүксүз ишин жана көрсөтүлгөн жардамдын сапатын контролдоо зарылдыгын баса белгиледи. ```
