Жашоочулардын айтымында, шаарда турак жай үчүн жер берүү 15 жылдан бери жүргүзүлбөй жатат. «Биздин үй-бүлөдө төрт уул бар, ошондуктан ар бирибиз жер тилкесин алуу үчүн арыз жазып, Баткен шаарынын мэриясына кайрылдык. Соңку жолу 2014-2015-жылдары бул маселе боюнча баргам. Бирок, тилекке каршы, бир туугандарыма да жер берилген жок. Натижада, төрт үй-бүлө бир үйдө жашоого мажбурбуз. Кээ бирлери шартка жараша батир ижарага алышат. Менин да балдарым бар, азыр менин өзүмө үй куруу үчүн жер жок, бөлүнүп чыгышым үчүн. Бул маселени чечишсе жакшы болмок. Биз кайда кайрылышыбыз керек экенин да билбейбиз», - дейт Баткен шаарынын тургуну Абдумиталиб Кошматов.
Баткен шаарынын мэриясынын маалымат кызматынан билдиришкендей, шаардык аймакта жер тилкелери жергиликтүү тургундарга турак жай куруу үчүн 2012-жылдан бери берилбей жатат.
Ошондой эле, мамлекеттик ипотекалык кредит берүү линиясы боюнча Баткен шаарында трансформация процедурасынан өткөн 12 гектардан ашык жер бөлүнгөнү белгиленди. Бул жерди рационалдуу пайдалануу жана калкты турак жай менен камсыз кылуу үчүн шарттарды түзүүгө багытталган.
Мэриядан такталгандай, Баткен шаарында жеке турак жай куруу үчүн которууга мүмкүн болгон бош жер тилкелери жок, алар кезекте турган жарандарга берилет.
Бүгүнкү күндө Баткен шаарында жер тилкесин алуу үчүн электрондук кезекте 5 миңден ашык адам турат.
