Соглашенинин максаты — Кыргызстанда жаңы кампусту түзүү, бул КРСУнун инфраструктурасын кеңейтүүгө мүмкүндүк берет. Проект университеттин билим берүү базасын өнүктүрүүнү жана 15 миң студентти окутуу үчүн шарттарды түзүүнү камтыйт, анын ичинде окуу корпустарын, жатаканаларды, ошондой эле социалдык жана инженердик инфраструктура объектилерин куруу.
Соглашенинин шарттарына ылайык, кампустун объектилерин каржылоо жана куруу россиялык тарапка жүктөлөт, ал ошондой эле долбоорлоону, курулуш иштерин, жабдууларды жеткирүүнү жана объектилерди пайдаланууга берүү менен алектенет.
Кыргыз тарап долбоорду ийгиликтүү ишке ашыруу үчүн зарыл болгон бир катар милдеттенмелерди өзүнө алат. Атап айтканда, ал:
- кампусту куруу үчүн жер тилкесин берет;
- сырттагы инженердик инфраструктураны тартууну камсыз кылат;
- керектүү уруксат документтерин жана макулдашууларды алууга жардам берет;
- мамлекеттик жана жергиликтүү бийлик органдары менен өз ара аракеттенүүнү камсыз кылат;
- инженердик тармактарды куруу жана туташтыруу боюнча иштерди уюштурууга көмөктөшөт;
- долбоор үчүн зарыл болгон жабдууларды жана материалдарды бажы менен каттоону камсыз кылат.
Ошондой эле Кыргызстан кампусту куруу үчүн 30 гектардан кем эмес жер тилкесин бөлүп берүүгө кепилдик берет.
Соглашенинин тиркемесинде долбоор үчүн 27,82 гектар жер тилкеси Чүй облусунун Аламедин районунун Байтик айылдык аймагында бөлүнгөнү, ошондой эле кампусту куруу үчүн айыл чарба жерлеринен турак жай жерлерине өткөрүлгөн 2,15 гектардык кошумча тилке көрсөтүлгөн.
Долбоорду ишке ашырууну көзөмөлдөө үчүн эки тараптуу комиссия түзүлөт, анын милдети курулуш иштерин координациялоо, пайда болгон маселелерди карап чыгуу жана соглашенинин аткарылышын көзөмөлдөө болуп саналат.
Курулуш аяктагандан кийин кампустун бардык объектилери Кыргыз-Россия Славян университетинин менчигине өткөрүлөт.
Бул мыйзамды ратификациялаган соң Кыргыз Республикасынын Тышкы иштер министрлиги россиялык тарапты соглашенинин күчүнө кириши үчүн зарыл болгон бардык ички процедуралардын аяктагандыгы тууралуу маалымдайт.
