Honda Aircraft компаниясы жаңы жеңил эки кыймылдаткычтуу реактивдүү учагы Elite IIни тааныштырды. Бул учак, Garmin компаниясынын авариялык автоматтык конуу системасы (EAL) үчүн Америка Кошмо Штаттарынын Жарандык авиация федералдык башкармалыгынан (FAA) сертификат алган класстагы биринчи учак болуп калды, деп билдирет Naked Science.
EAL технологиясы учакка өзгөчө кырдаалдарда толук автономдуу конуу мүмкүнчүлүгүн берет.
Garmin EAL системасы реалдуу убакытта аба ырайынын шарттарын, жердин рельефин, отундун калдыгын жана конуу-учуу тилкелери боюнча параметрлерди талдайт, бул конуу үчүн эң ылайыктуу аэродромду тандоого мүмкүндүк берет. Устройство өз алдынча учуу параметрлерин жөнгө салып, навигацияны аткарат жана конууга киришет, ошондой эле толук токтогонго чейин тормоздорду активдештирет.
Системаны активдештирүү кол менен (кнопка аркылуу) же автоматтык түрдө, эгер датчиктер пилоттон реакция болбогонун аныктап калса, жүргүзүлүшү мүмкүн. Бул учурда система аба кыймылынын башкаруу кызматтарына болгон кырдаал тууралуу маалымат берет.
Авариялык конуу функциясынан тышкары, Elite II Garmin Autothrottle автоматтык башкаруу системасы менен жабдылган, ал учуунун бардык этаптарында кыймылдаткычтардын иш режимин өз алдынча жөнгө салып, оптималдуу ылдамдык жана отундун сарптоосун камсыз кылат.
Honda Aircraft өкүлдөрү EAL жана Autothrottle системаларын колдонуу экипаждын жүгүн кыйла азайтып, бир пилоттун учакты коопсуз башкаруусуна мүмкүндүк берерин белгилешти. Учурда компания бул технологияларды дүйнөнүн башка маанилүү авиациялык базарларында сертификаттоонун үстүндө иштеп жатат.
