Бул программанын негизги максаты — фермерлерге жана дехкандарга жазгы талаа иштеринде мамлекеттик колдоо көрсөтүү. Дуйшеевдин белгилөөсү боюнча, каржылоону үч негизги багытка бөлүштүрүү пландалууда: 70% каражат мал чарбачылыгына, 20% өсүмдүк чарбачылыгына, ал эми калган 10% суу үнөмдөөчү технологияларды киргизүүгө жумшалат. Бул акча эквивалентинде мал чарбачылыгына 1 миллиард 713 миллион сом, өсүмдүк чарбачылыгына 489,6 миллион сом жана суу үнөмдөөчү технологияларды өнүктүрүүгө 244,8 миллион сомду түзөт.
Министрдин орун басарынын айтымында, быйылкы жылы программаны каржылоонун көлөмү өткөн жылга салыштырмалуу бир аз азайган. Бул алты мамлекеттик кредит программасы бир убакта ишке киргизилгени менен байланыштуу, алар тукумдук мал чарбачылыгын, үрөнчүлүк жана питомник чарбаларын, ошондой эле бириккен товар өндүрүүчүлөрдү каржылоону камтыйт. Мындан тышкары, Бишкек жана Чүй облусунда эт мал чарбачылыгын өнүктүрүү долбоору башталат.
«Биз коммерциялык банктар менен программалар арасында каражаттарды зарылчылыкка жараша кайра бөлүштүрүү боюнча макулдашууга жетиштик. Быйылкы жылы биз калкты жеңилдетилген кредиттер менен камсыздоого аракет кылабыз», — деп кошумчалады ал.
Дуйшеев «ФСХ-14» программасынын алкагында суу үнөмдөөчү технологияларды киргизүүгө өзгөчө көңүл бурулганын белгиледи. «Климаттын өзгөрүүлөрүн эске алуу менен фермерлерди мындай технологияларды колдонууга адаптациялоо зарыл», — деп баса белгиледи ал.
