Turmush маалымдагандай, 25-мартта муниципалитеттин, ички иштер башкармалыгынын жана шаар прокуратурасынын өкүлдөрү менен жергиликтүү тургундардын ортосунда жолугушуу өттү.
Жолугушуу учурунда тургундар жакында жаңыланган көчөлөрдө зарыл жол белгилеринин жана светофорлордун жоктугун көтөрүштү. Мисалы, Ремесленников көчөсүнүн бир тургуну Алишер Навои көчөсүнүн ремонтунан кийин унаалардын ылдамдыгы кыйла жогорулаганын белгилеп, бул өз кезегинде жол кырсыктарынын көбөйүшүнө алып келгенин айтты.
Анын айтымында, акыркы убакта балдарга болгон бир нече унаа уруп кетүү учурлары болду, алардын бири трагедия менен аяктады — бала каза болду. «Алишер Навои көчөсү толугу менен асфальтталды, бирок азыр унаалар өтө жогору ылдамдыкта жүрүп жатат. ылдамдыкты чектеген белгилер жетишсиз. Светофорлорду орнотуу боюнча биздин сурообузга уруксат берилбейт деп жооп беришти. Биз ушул участкаларга светофорлорду жана ылдамдыкты чектеген белгилерди орнотууну суранабыз», — деди ал.
Ошондой эле тургундар Курманжан-датка көчөсүнөн «Тешик-Таш» базарына чейинки аймакта жөө адамдардын өтүүчү жерлери жана тиешелүү белгилердин жоктугун белгилешти. Бул жагдай да талкууга чыгарылды.
Жолугушуунун жүрүшүндө жакында ремонттолгон бардык жол участкаларында жөө адамдардын өтүүчү жерлерин тез арада белгилөө, светофорлорду орнотуу жана ылдамдыкты чектеген белгилердин санын кыйла көбөйтүү керектиги баса белгиленди.
Ош шаардык мэриясынын маалыматына ылайык, 2025-жылы шаарда болжол менен 82–83 чакырым жол ремонттолуп, 21–22 чакырым тротуар төшөлгөн.
