Экономика жана соода министрлигинин ишкердикти өнүктүрүү бөлүмүнүн начальниги Нурбек Уметалиев жалпы суммадан 300 миллион сом банктардын чыгымдарын субсидиялоого жумшалат деп белгиледи. Ал банктар ишкерлерге кредит бергенде, чыныгы пайыздык чен менен жеңилдетилген пайыздык чендин ортосундагы айырманы мамлекет жабарын түшүндүрдү. Мисалы, эгер чыныгы чен 12–15% болсо, мамлекет бюджеттен 6–9% компенсациялайт.
«Бул сумма бир жылга бөлүнгөн, ал эми кредит берүү мөөнөттөрү бир жылдан беш жылга чейин өзгөрүлүп турат. Программа өлкөнүн бардык региондорун камтыйт, анын 60% каражаты региондорго, 40% Бишкек жана Ошго жумшалат», - деп кошумчалады ал.
Уметалиев ошондой эле программдагы маанилүү өзгөрүүлөрдүн бири кредиттин максималдуу көлөмүнүн жогорулоосу экенин баса белгиледи. Мурда ишкерлер 10–15 миллион сомго чейин финансылык жардам ала алышса, азыр бул чектөө 50 миллион сомго чейин жогорулатылды, эгер негиздеме жана кошумча каражатка муктаждык болсо.
Мындан тышкары, кредиттер мамлекеттик жана жеке коммерциялык банктар аркылуу жеткиликтүү болот. Ишкерлерге кошумча түшүндүрмөлөр берилет.
