Бар болгон маалыматтарга ылайык, айрым студенттер онлайн режиминде төлөмдү бир гана жолу төлөп, андан кийин чектерин WhatsApp топторунда бөлүшөт. Натыйжада, бир эле чек 10–20 студент тарабынан төлөмдү тастыктоо үчүн колдонулат, бул аларга автобустан кошумча чыгымдарсыз чыгууга мүмкүнчүлүк берет.
Мындай жүрүм-турум айдоочулар үчүн олуттуу кыйынчылыктарды жаратып, коомдук транспорт системасында тартипти бузат.
Ош шаардык муниципалдык автотранспорт ишканасынын басма сөз кызматынан билдиришкендей, төлөм эрежелерин бузган жүргүнчүлөр укук коргоо органдарына өткөрүлөт. «10–20 адамдан турган чет элдик студенттер тобу автобуска кирет. Төлөмдү алардын ичинен бирөө гана төлөйт, ал андан кийин чекти калгандарына жиберет. Башка студенттер ошол эле чекти айдоочуга көрсөтүп, чыгышат. Мындай бузулуулар аныкталганда, биз маалыматты милицияга өткөрүп беребиз. Бузуучуларга протоколдор түзүлүп, мыйзамга ылайык чаралар көрүлөт. Кечээки окуядан кийин рейддик иш-чаралар башталды. Эгерде кайрадан бузуу болсо, жүргүнчүлөрдү ОВДга өткөрөбүз», - деп билдиришти басма сөз кызматынан.
Ош шаардык Ички иштер башкармалыгы да социалдык тармактарда видео пайда болгондон кийин эки чет элдик студенттин жеке жактарын аныктаганын, алар менен кырдаалды түшүндүрүү боюнча сүйлөшүүлөр жүргүзүлгөнүн белгиледи. «Видеонун таралышынан кийин биз эки студентти аныктап, алар менен түшүндүрүү иштери жүргүзүлдү. Маалымат жетекчиликке жеткирилди. Учурда жетекчиликтин көрсөтмөсүнө ылайык, чет элдик студенттер жана коомдук транспортту пайдаланган жарандар арасында түшүндүрүү иш-чаралары жүргүзүлүүдө», - деп билдиришти Ички иштер башкармалыгынан.
Учурда коомдук транспортто жүрүү акысынын төлөм эрежелеринин сакталуусун көзөмөлдөө күчөтүлдү жана рейддик иш-чаралар уланууда.
