Мугалимдерге болгон сый-урматтын жоктугу үчүн айып пулдардын көбөйтүлүшү
Жаңы сунуштарга ылайык, педагогикалык кызматкерди кызматтык милдеттерин аткаруу учурунда, анын ичинде сөгүнүү, адепсиз аракеттер жана кемсинтүү үчүн айып пул беш эсе көбөйөт. Азыркы учурда мындай аракеттер үчүн эскертүү же 10 эсептик көрсөткүч (1 миң сом) өлчөмүндө айып пул каралган, ал эми жаңы өзгөртүүлөрдө 50 эсептик көрсөткүч (5 миң сом) же эскертүү берүү сунушталууда.
Ошондой эле ата-энелер үчүн жоопкерчилик чаралары өзгөртүлөт. Эгер мындай укук бузууну 16 жашка чейинки бала жасаса, учурда болгону эскертүү каралган. Эскертүү же 100 эсептик көрсөткүч (10 миң сом) өлчөмүндө айып пул салуу мүмкүнчүлүгүн киргизүү сунушталууда.
Мугалимдердин ишине кийлигишүү үчүн жоопкерчиликти киргизүү
Мамлекеттик жана муниципалдык билим берүү мекемелеринин педагогдорунун мыйзамдуу кесиптик ишине тоскоолдук кылуу боюнча жаңы статья менен Кодекстин толукталышы сунушталууда.
Укук бузууларга мугалимдерди өз милдеттерине тиешеси жок иштерге тартуу; мыйзам тарабынан каралбаган отчеттуулук жана маалымат талап кылуу; мыйзамсыз текшерүүлөр; өз эсебинен товар же кызмат сатып алууга мажбурлоо; ошондой эле алардын кесиптик ишине тиешеси жок иш-чараларга катышууга мажбурлоо сыяктуу аракеттер кирет.
Мындай аракеттер үчүн айып пулдар төмөнкүдөй болот: биринчи укук бузуулар үчүн жеке адамдарга — 50 эсептик көрсөткүч (5 миң сом), кызмат адамдарына — 100 эсептик көрсөткүч (10 миң сом). Жыл ичинде кайрадан укук бузуулар болсо, айып пулдардын өлчөмү көбөйөт: жеке адамдар үчүн — 100 эсептик көрсөткүч (10 миң сом), кызмат адамдары үчүн — 200 эсептик көрсөткүч (20 миң сом).
«Бул мыйзам долбоорунун негизги максаты — билим берүү мекемелериндеги педагогикалык кызматкерлердин укуктарын жана эркиндиктерин коргоо, ошондой эле алардын кесиптик ишине тоскоолдук кылган укук бузуулар үчүн жоопкерчиликти күчөтүү», — деп билдиришти Билим берүү министрлигинен.
Мыйзам долбоору февраль айынын аягына чейин коомдук талкууга жеткиликтүү болот.
