“Мен үч университетке документтеримди тапшыргам жана ошол учурда 280 сом төлөгөнмүн. Биздин үй-бүлө үчүн бул чоң сумма болчу, мен гитарамды сатууга мажбур болдум”, - деди ал.
Бекешев ошондой эле мурда ар бир предметти тапшыруу наркы 200 сом болгонун, бирок кийинчерээк баа 470 сомго көтөрүлгөнүн эске салды.“Бул аз кирешелүү үй-бүлөлөр үчүн кыйынчылыктарды жаратууда. Мындан тышкары, ар бир үй-бүлө балдарын ОРТга даярдоо үчүн акы төлөнүүчү курстарга жиберүүгө мажбур. Бул гана эмес, стресс да, ошондой эле чоң финансылык чыгымдар. Мен анализ жүргүздүм, жана СНГ, Европа жана АКШнын көпчүлүк өлкөлөрүндө мындай тесттер үчүн каражаттар мамлекеттик бюджеттен бөлүнөт, жана үй-бүлөлөр чыгым тартпайт”, - деп белгиледи депутат.
Бекешевдин айтымында, мамлекеттик бюджет азыр профицитте, бирок бул багытка каражаттар азырынча бөлүнбөй жатат.
“Келгиле, ушул жылдан баштайлы. Даярдыкты жана тестти тапшырууну акысыз кылабыз. Мен Каржы министрлигин ОРТ үчүн каражат бөлүүгө чакырам. Биздин бюджетте мүмкүнчүлүк бар, Минфин айткандай, акча бар. Кандай сумма талап кылынарын баалап, аны бюджетке киргизүү керек”, - деди ал кесиптештерине, бүтүрүүчүлөр тесттин жыйынтыктарын бир ай күтүү керек экенин, ал эми бул процессти автоматташтырууга болорун кошумчалады.
Мындан тышкары, Бекешевге Узген районунун тургундары кайрылып, кээ бир окуучуларга ОРТ тапшырууга уруксат берилбей жатканы тууралуу суроо беришкен.
“Мектептер тестти тапшыруу үчүн он мыкты окуучуну тандайт, өзүнүн рейтингин жогорулатуу үчүн. Бул мыйзамсыз. Окуу жайлары ОРТ тапшырууга тоскоол болбошу керек”, - деп баса белгиледи ал.
Ошондой эле депутат ОРТ 9-класстан кийин колледждерге кирүү үчүн талап кылынбайт деген пикирди билдирди.
