Кыргыз Республикасынын Юстиция министрлигинин биринчи орун басары Алмазбек Зарылбек уулу билдиргендей, Граждандык кодекске электрондук акчаларды мүлктүн бөлүгү катары тааный турган жобо киргизилет.
«Бул санариптик капчыктар жана алардын ичиндеги каражаттар мурас катары салттуу банк эсептери сыяктуу эле өткөрүлө ала турганын билдирет», — деп белгиледи ал.
«Платеждик система жөнүндө» мыйзамга сунушталган өзгөртүүлөр так процедураны киргизет: электрондук акчанын ээси өлгөндөн кийин, эмитент нотариустун же мурас алгандардын арызы боюнча операцияларды бөгөттөөгө, каражаттардын бар экендиги тууралуу маалымат берүүгө жана укуктарды тастыктагандан кийин мурас алгандарга өткөрүүгө милдеттүү болот.
Ошондой эле өзгөртүүлөр «Банктар жана банк иши жөнүндө» мыйзамды да камтыйт: анда банктар нотариустарга өлгөндөрдүн депозиттери жөнүндө гана эмес, ошондой эле электрондук акчалар, сейфтик ячейкалар, металлдык эсептер жана башка активдер тууралуу маалымат берүүгө милдеттүү экендиги так жазылат», — деп кошумчалады ал.
Вице-министрдин айтымында, өлкөдө 6,6 миллионго жакын электрондук капчык катталган жана мурас алуу боюнча бирдиктүү тартиптин жоктугу талаш-тартыштарды жана түшүнбөстүктөрдү жаратууда. Жаңы мыйзам долбоору юридикалык боштуктарды жоюп, жарандардын мүлктүк укуктарын коргоого багытталган.
Депутаттар «электрондук акча» түшүнүгүн тактоону сунушташты, жарандардын эсептеринде ар кандай өлкөлөрдүн валюталары болушу мүмкүн экенин белгилешти.
Депутат Медер Чотонов мурас алууга укуктуу адам өлгөн тууганынын банктардагы каражаттары тууралуу кантип маалымат алаарын сурады. Вице-министр мыйзам долбоору нотариустарга өлгөндөрдүн депозиттери тууралуу маалымат берүү өтүнүчү менен банктарга суроо жөнөтүүгө мүмкүнчүлүк берет жана банктар бул маалыматтарды берүүгө милдеттүү экенин айтты.
Чотонов ошондой эле өлгөн электрондук акчанын ээси мурас алгандары жок болсо, белгилүү бир мөөнөттөн, мисалы, 5-10 жылдан кийин, бул каражаттар мамлекеттин менчигине өтүшү мүмкүн экендигин карап чыгуу сунушун берди.
Вице-министр юридикалык нормаларга ылайык, электрондук акчалар банктарда белгисиз мөөнөткө сакталат, бирок депутаттын сунушун эске алууга убада берди.
