Жогорку Кенештин эмгек, саламаттык сактоо, аялдар жана социалдык маселелер боюнча комитетинин жыйынында депутат Улукбек Карыбек уулу өлкөнүн түштүк региондорунда кол микрохирургиясы борборунун жоктугуна көңүл бурду.
Ал Кыргызстанда Бишкекте жайгашкан жалгыз борбор иштеп жатканын жана бейтаптар керектүү дарылоону алуу үчүн борборго барууга мажбур экенин белгиледи.
«Ошто ушундай борбор же эң болбосо бөлүм ачуу пландалуудабы?» - деп сурады ал Саламаттык сактоо министрлигинин өкүлдөрүнөн.
Саламаттык сактоо министринин орун басары Айбек Маткеримов бул маселе каралаарын билдирди.
«Бизге жыл сайын жардам сурап кайрылган бейтаптардын санын тактоо керек. Ошондой эле адистерди даярдоо үчүн кадр жетишсиздиги маселесин эске алуу зарыл», - деп кошумчалады ал.
Карыбек уулу Ош облустук ооруканасынын кызматкерлеринен наркоз үчүн төлөм талап кылгандыгы боюнча жарандардан арыздар келип жатканын белгиледи.
«Мен төрөт үйлөрүнүн ишине да көңүл бурууну суранам. Мыйзамда төрөт жана төрөттөн кийинки дарылоо бир жыл бою акысыз болушу керек деп так жазылган», - деди депутат.
Министрдин орун басары медициналык кызматкерлер арасында системанын репутациясын бузган бир нече адамдар бар экенин айтып, мындай учурларды аныктоо боюнча иштер улантылып жатканын билдирди.
