Депутат Улугбек Карыбек уулу алыстан иштеген кызматкерлердин эмгек укуктарын коргоо боюнча суроо берди.
Бул суроого биринчи вице-министр Камчыбек Досматов жооп берип, өткөн жылдын январь айында жаңыланган Эмгек кодекси кабыл алынганын, анда алыстан жана дистанциялык иш формалары камтылганын белгиледи. Ал ошондой эле Эмгек министрлигинде кызматкерлер өз укуктарынын бузулушу боюнча арыздар менен кайрылса болот деген комиссия иштеп жатканын маалымдады.
Депутат Гулшаркан Култаева эмгек отпускуларынын темасын көтөрдү.
Ал, айрым учурда, жумуш берүүчү кызматкерди отпусктан өз каалаганындай чакырып ала турганын, натыйжада отпусктун бир бөлүгү пайдаланылбай калышы мүмкүн экенин белгиледи. "Мындай учурларда эмне кылыш керек?" - деп сурады ал.
Досматов отпусктан чакырып алуу кызматкердин макулдугу менен гана мүмкүн экенин, мажбурлап чакырып алуу болбой турганын түшүндүрдү.
Култаева ошондой эле: "Эгер кызматкер ушул жылы отпускун пайдаланбаса, келерки жылы аны пайдалана алабы? Чектөөлөр барбы?" - деп тактады.
Вице-министр, мүмкүн болгон чектөөлөр боюнча так маалымат бере албасын, бирок Эмгек кодексине ылайык, пайдаланылбаган отпуск кийинки жылга өткөрүлүшү мүмкүн экенин билдирди.
