Социалдык тармактагы Truth Social баракчасында Трамп: «НАТОнун башкы катчысы Марк Рютте менен болгон натыйжалуу жолугушуудан кийин биз Гренландия жана Арктика аймагы боюнча келечектеги келишимдин негизин түздүк. Эгер бул ишке ашса, бул Америка Кошмо Штаттарына жана НАТОнун бардык өлкөлөрүнө маанилүү пайда алып келет», — деп белгиледи.
Мындан тышкары, ал Данияны колдогон өлкөлөр үчүн 1-февралга белгиленген бажы салыктарын жокко чыгаруу чечимин жарыялады.
CNBC телеканалына берген интервьюсунда Ак үйдүн башчысы бажы салыктарын жокко чыгаруу «концептуалдык келишимге» байланыштуу экенин тастыктады.
«Муну түшүндүрүү бир аз кыйын болот, бирок биз муну кийинчерээк жасайбыз. НАТОнун башкы катчысы, мен жана дагы бир нече адам сүйлөшүүлөрдү жүргүздүк», — деп кошумчалады ал.
Трамп ошондой эле Америка Кошмо Штаттары менен Европа Гренландияда «Алтын купол» абадан коргонуу системасын куруу менен гана эмес, ошондой эле кен казып алуу тармагында да биргелешип иштээрин баса белгиледи. Анын айтымында, бул келишим «туура» иштейт.
Мурда Трамп Гренландия боюнча талаш-тартыштардан улам Улуу Британия, Дания жана башка европалык өлкөлөргө кошумча бажы салыктарын киргизүү ниетин билдирген.
Эскерте кетсек, АКШ Конгрессине «Гренландияны аннексиялоо жана ага штат статусун берүү» боюнча мыйзам долбоору сунушталган. Документтин түшүндүрмө жазуусунда президентке Гренландияны өз аймагы катары сатып алуу үчүн «керектүү ыйгарым укуктар» берилет деп көрсөтүлгөн.
Трамп мурда Гренландияга «кайсы бир жол менен» контролду алат деп билдирген. Ал аралды сатып алуу идеясын мурдагы президенттик мөөнөтүндө да айткан жана 2025-жылдын мартында аннексия мүмкүн экенин, Копенгагенге соода бажы салыктарын киргизүү менен коркуткан.
Гренландия Даниянын курамындагы автономдуу аймак болуп саналат. 1951-жылы Вашингтон менен Копенгаген аралды коргоо боюнча келишимге кол коюшкан, анын негизинде Америка Кошмо Штаттары анын коргонушун потенциалдуу коркунучтардан камсыз кылууга милдеттенмелерди алган.
