Спикердин айтымында, кафе, ресторан, такси жана чач тарачтардагы кызмат көрсөтүүлөрдүн баасы кыйла жогорулаган, кээде эл аралык борборлордун баасынан да ашып кеткен. «Тейлөө акысы алынып салынганына карабастан, мекемелер аны тамак-аштын баасына киргизишти. Натыйжада алар чыгым тарткан жок, ал эми адамдар мурдагыдай эле, эгер көбүрөөк эмес болсо, ошол эле сумманы төлөп жатышат. Ошондуктан мындай чараларды киргизүүдөн мурун, кырдаалды кылдат талдоо керек», — деп баса белгиледи Нурланбек Тургунбек уулу.
Ал ошондой эле өкмөттүн бул багытта жетиштүү иштерди жүргүзбөй жатканын айтып, ушул маселелерди талкуулоо үчүн Кабминдин мүчөлөрүн пленардык жыйынга чакырууну сунуштады.
