Ведомствонун маалыматына ылайык, 27-январда эртең мененки рейд учурунда мэр тиешелүү кызматтардын жетекчилери менен бирге Тилеке баатыра көчөсүндөгү 4 кабаттуу имаратты, мурдагы вице-мэр, азыркы Счеттук палатасынын аудитору Алимжан Байгазаковго таандык имаратты текшерди.
Аталган объект эски автобекеттин аймагында жана Ак-Буура дарыясынын суу коргоо зонасында мыйзамсыз курулган. Көп жолу алып салуу зарылдыгы тууралуу эскертүүлөр берилгенине карабастан, талап бүгүнкү күнгө чейин аткарылган жок.
Ошондуктан Ош мэри бул имаратты, ошондой эле анын жанындагы объекттерди, учурда максаттуу пайдаланылбай жаткан автобекет №1ди алып салуу тапшырмасын берди.
Мындан мурда мэрдин тапшырмасы боюнча бул курулуштун жанындагы «Кристалл» мейманканасынын имараты алынып салынганын белгилеп кетүү керек.
Turmush мурда жазгандай, 2025-жылдын 15-декабрында Ош шаарындагы «Кристалл» мейманканасын алып салуу иштери 90%га жакын аяктаган.
Учурда имараттын негизги бөлүгү бузулган, курулуш калдыктарын тазалоо иштери уланууда.
Учурдагы абалдан көрүнүп тургандай, мейманкананын дубалдары, чатырлары жана ички конструкциялары дээрлик толугу менен демонтаждалган. Аймакта оор техникалар иштеп жатат, курулуш калдыктары чыгарылууда.
- Эскерте кетсек, «Кристалл» мейманканасын алып салуу иштери октябрда башталган. Муниципалдык кызматтардын маалыматына ылайык, демонтаж боюнча чечим дарыянын 50 метрлик коргоо зонасында жайгашкандыгы менен байланыштуу кабыл алынган. Мурда берилген эскертүүлөргө карабастан, имараттын ээлери өз ишмердүүлүгүн улантышты.
- Мурда мэр Женишбек Токторбаев шаардык кенештин сессиясында бул мейманкана алынып салынарын билдирген.
Учурдагы мыйзам талаптарына ылайык, каналдардын суу коргоо зонасы ар бир тараптан 6дан 50 метрге чейин созулат. Мисалы, Моюн, Жаны-Арык жана Жоо-Бас каналдарынын суу коргоо зонасы 6 метр, ал эми Ак-Буура дарыясынын суу коргоо зонасы 50 метр. Увам каналынын суу коргоо тилкеси ар бир тараптан 30 метрди түзөт.
