Берилген маалыматка ылайык, 13-февралда Чүй районунун ички иштер бөлүмүнө Н.И. аттуу жаран кайрылган. Ал ошол күнү саат 16:00 чамасында Т.Д. аттуу жаран жана анын тааныштары тарабынан күч менен үйүнөн чыгарылганын, андан кийин Ак-Бешим айылына алып барып, физикалык зомбулукка кабылганын билдирген.
Бул факт боюнча Кыргыз Республикасынын Кылмыш кодексинин 165-беренеси «Адамды уурдоо» боюнча кылмыш иши козголду.
Оперативдүү-издөө иш-чараларынын жүрүшүндө укук коргоо органдары шектүүлөрдүн үчөөсүнүн жеке башын аныктап, кармашты. Алар 2007-жылы төрөлгөн жигиттер. Балдар убактылуу кармоо жайына жайгаштырылды.
Тергөө учурунда окуянын катышуучуларынын ортосунда карыздык милдеттенмелерге байланыштуу душмандык мамиле болгондугу аныкталды.
Учурда зарыл соттук-укуктук экспертизалар жүргүзүлүүдө, ошондой эле бул инциденттин бардык жагдайларын аныктоо үчүн тергөө иш-чаралары жүргүзүлүүдө. Тергөө уланууда.
