Институттун директору Данияр Каскеев имарат 1984-жылы курулганын жана ошондон бери капиталдык ремонттон өтпөгөнүн билдирди. Бирок, мекеме ишин улантууда жана жыл сайын өлкөнүн ар кайсы бурчтарынан 13 миңден ашык бейтапты тейлейт.
Парламенттин депутаты Гулнара Баатырова институттун коомчулук үчүн маанилүүлүгүнө жана бейтаптар үчүн ыңгайлуу шарттарды түзүү зарылдыгына көңүл бурду. Ал, баатыр энелер үчүн акысыз дарылоо маселесине өзгөчө көңүл буруу керектигин белгилеп, институтту тез жардам унаалары менен камсыздоо зарылдыгын баса белгиледи.
Депутат Гулкан Молдобекова тамактанууга бөлүнгөн каржылоонун жетишсиз экендигин билдирип, аны көбөйтүүгө чакырды. Мындан тышкары, ал медициналык кызматкерлерди турак-жай менен камсыздоо маселесин белгиледи.
Депутат Токтобубу Ашымбаева бул институт бальнеология жана реабилитация тармагында алдыңкы илимий-медициналык борбор экенин баса белгиледи. Ал бейтаптар үчүн ыңгайлуу шарттарды түзүү жана дарылоонун сапатын жогорулатуу, өзгөчө мүмкүнчүлүгү чектелген адамдар жана балдар үчүн маанилүү экенин айтты.
Комитеттин мүчөлөрү Кыргыз илимий-изилдөө курортология жана реабилитация институтун модернизациялоо боюнча чараларды кабыл алууну сунушташты, анын ичинде заманбап медициналык жабдууларды сатып алуу, капиталдык ремонт жүргүзүү, медициналык кызматтардын сапатын жакшыртуу жана кызматкерлердин айлыктарын жогорулатуу.
