Министрдин орун басары реконструкцияланган авто жолдор үчүн кепилдик мөөнөтү үч жылды түзөрүн, ал эми жаңы жолдор үчүн беш жылга чейин узартыларын билдирди. Бул мезгилде курулуш компаниясы тарабынан берилген кепилдик Министрликте банк кепилдиги түрүндө сакталат.
«Курулуш аяктагандан кийин беш жыл бою компаниянын кепилдиги Минтранста калат. Эгер жолду пайдалануу учурунда кемчиликтер аныкталбаса, каражат кепилдик мөөнөтүнүн аяктаганынан кийин кайтарылат», — деди Базаралиев.
Эгер жолду пайдалануу учурунда кемчиликтер табылса, подрядчик өз эсебинен аларды жоюуга милдеттүү.
«Эгер компания кемчиликтерди жоюу боюнча иштерди аткаруудан баш тартса, министрлик банк кепилдигинен зарыл суммада кармап калууга укуктуу», — деп кошумчалады министрдин орун басары.
Акимбаева ошондой эле кемчиликтер аныкталган учурда подряддык уюмдарга кандай чаралар көрүлөрү тууралуу кызыкты. Буга Базаралиев текшерүүлөрдө табылган кемчиликтердин тизмеси түзүлүп, подрядчыга жоюу үчүн жөнөтүлөрүн айтты.
«Биз банк кепилдигинен каражаттарды өндүргөн учурларды эстебейм. Бирок подряддык уюмдар кепилдик милдеттенмелери боюнча кемчиликтерди жоюган учурлар болгон», — деп жыйынтыктады ал.
