Суйумбаев атындагы стадион өткөн жылы капиталдык ремонттон өткөн: чыгыш жагындагы чатыр, түндүк жана түштүк трибунасы жабылган, ал эми жеңил атлетика жолуна эл аралык стандарттарга жооп берген резина төшөлгөн.
Иштерди ОсОО «Универсал» аткарган. Заказчы Ош шаарынын мэриясынын капиталдык курулуш башкармалыгы болгон.
Стадионду куруу боюнча техникалык көзөмөлдү жүргүзгөн УКСтин адиси Эркин Эргешов Turmushка берген комментарийинде, аталган бетон элементтер колонналардын негизинде куюлганын, алардын кызмат мөөнөтүн узартуу үчүн жасалганын, бирок алардын бузулушу конструкцияга таасир этпей турганын билдирди. «Стадиондун чатырын кармап турган айрым колонналар жөнүндө сөз болуп жатат. Негизинде биз бетон куйганбыз, алар узак убакыт кызмат кылсын деп. Бирок бул бетондун бузулушу конструкцияга таасир этпейт, анткени колонналардын негиздери абдан бекем. Жалпы алганда, алар узак убакытка чыдашы үчүн бетонду мезгил-мезгили менен жаңыртып же боёп туруу керек. Биз азыр аны шпатлевкалап, боёп коебуз», - деди ал.
Ал колонналардын негиздери башында болжол менен 2 метр тереңдикке казылып, бетон куюлганын, андан кийин колонналар орнотулганын тактады.
Ош шаардык спорт комитетинин имаратынын сол жагындагы тосмодо да бетон бөлүктөрү бузулуп баштады. Комитеттин кызматкери Фарух Сыдыковдун билдирүүсүнө караганда, тосмо мурдагы жетекчилик тарабынан орнотулган.
«Сол жагындагы участок жеке менчикке таандык. Эгерде ээлери ал жакта курулуш баштаса, мурдагы жетекчилик аймакты тосуп койгон. Кийин стадиондун колонналарын орнотууда жер казуучу иштер жүргүзүлүп, топурак жана таштар ошол тарапка ташталган, ошондуктан тосмодогу бетон бузулуп кеткен. Ички жагында бетон жакшы абалда, ал эми сырты — ушундай болуп калды», - деди Сыдыков.
Анын айтымында, учурда аталган тосмону оңдоо боюнча чаралар көрүлүүдө.
