Фонддун жетекчиси Адилет Джанузаков жаңы команда уюмдун ишин кеңири баалап, финансылык дисциплинаны жогорулатууга жана чыгымдарды оптималдаштырууга, ошондой эле каражаттарды приоритеттүү багыттар боюнча бөлүштүрүүгө көңүл бурганын белгиледи.
«Финансылык контролду күчөтүү аркылуу фонд 56,1 миллион сомдук дебитордук карызды кайтарып алууга жетишти, анын ичинде Нарын шаарындагы жана Тосор айылындагы долбоорлор боюнча насыяларды толугу менен жаптык. Биз ошондой эле IT, байланыш жана кошумча кызматтар боюнча чыгымдарды оптималдаштырдык, бул болсо башкаруунун көбүрөөк ачык жана туруктуу моделин түзүүгө мүмкүндүк берди», — деп айтылат билдирүүдө.
Жыйналган каражаттар негизги инфраструктуралык долбоорлорду ишке ашырууга жумшалат.
«Учурда 18 Rest Point объектилеринин 11и иштеп жатат, калган 7си аяктоо стадиясында. Мындан тышкары, биз Ош облусунда үч жаңы объектти куруу үчүн Дүйнөлүк банк тарабынан 4,5 миллион доллардан ашык гранттык каражаттарды тарттык», — деп кошумчалады Адилет Джанузаков.
Ал ошондой эле фонддун кызыкчылыктарын коргогон GoBus компаниясы туруктуу жүргүнчү ташууларды жүргүзүп, ири туристтик жана имидждик иш-чаралардын логистикалык өнөктөшү болуп жатканын белгиледи. Учурда шаар аралык ташуулар үчүн электрондук билет системасын киргизүүгө даярдык көрүлүүдө.
Мындан тышкары, фонд инвестицияларды тартуу жана узак мөөнөттүү экономикалык натыйжа жаратуу максатында улуттук мааниге ээ долбоорлорду илгерилетүүдө. «Тамга-Тосор» эл аралык спорттук комплекси долбоорунун алкагында инвесторлор менен активдүү иш жүргүзүлүп, жалпы инвестициянын көлөмү 100 миллион доллардан ашат. Ошондой эле Baytik Mountain Resort жана Chatkal Mountain Resort курортторун өнүктүрүү улантылууда.
