Жолугушуунун катышуучулары Кыргызстан менен Италиянын соода-экономикалык жана инвестициялык кызматташтыгын кеңейтүү мүмкүнчүлүктөрүн, ошондой эле B5+1 форматында биргелешкен иш-чараларды пландаштырууну талкуулашты. Сүйлөшүүнүн жүрүшүндө Кыргызстанды Италия үчүн 15 приоритеттүү өлкөнүн тизмесине киргизүү, эки тараптуу мамилелерди өнүктүрүүгө болгон жогорку деңгээлдеги ишеним жана стратегиялык кызыгуунун белгиси катары белгиленди.
Равшанбек Сабиров Кыргыз Республикасынын Италия Республикасы менен байланыштарды бекемдөөгө чоң маани берерин жана чет элдик капиталдын агымын колдой турганын белгиледи. Ал өлкөдө инвесторлордун укуктарын коргоо боюнча иштеп жаткан мыйзамдар жана эл аралык милдеттенмелерге ылайык ишенимдүү кепилдиктер орнотулганын айтты. «Биз узак мөөнөттүү стратегиялык өнөктөштүккө ачыкпыз жана бизнес жүргүзүү үчүн ыңгайлуу шарттарды түзүүгө даярбыз», — деп кошумчалады ал.
Улуттук агенттик сүйлөшүүлөрдүн катышуучуларын инвестициялык климатты жакшыртууга багытталган институционалдык жана регулятордук реформалар менен, ошондой эле инвесторлор үчүн мамлекеттик колдоо механизмдери жана энергетика, өнөр жай, агроөнөр жай комплекс жана инфраструктура тармактарындагы приоритеттүү долбоорлор менен тааныштырды.
Жолугушуунун натыйжасында тараптар кызматташтыкты бекемдөөнү жана биргелешкен демилгелерди ишке ашырууну улантууга ниеттенерин билдиришти.
