Кыргыз Республикасынын омбудсмени Жамиля Жаманбаевага Талас жашоочулары кайрылып, өздөрүнүн эмгек укуктарын коргоону суранышты, деп билдирди институттун басма сөз кызматы.
21 адам 5-16-январь аралыгында Таласта көп кабаттуу үйдүн курулушунда иштегенин, ал мамлекеттик ипотекалык компаниянын долбоору боюнча курулганын билдиришти. 16-январда аларды күтүүсүздөн жумуштан бошотуп, алардын ордуна башка өлкөдөн 60га жакын жумушчу тартылган.
Арзып келгендер жумушка орношууда эмгек келишимдери түзүлгөн эмес экенин, бирок жумуш убактысын эсепке алуу журналы бар экенин, ошондой эле алардын эмгек ишмердүүлүгүнүн фото- жана видео далилдери бар экенин белгилешти. Алар укуктарын калыбына келтирүүгө жана кайра жумушка орношууга жардам берүүнү өтүнүштү.
Институт Акыйкатчы эмгек мыйзамдарын көзөмөлдөө жана текшерүү кызматына, "Мамлекеттик ипотекалык компания" акционердик коомуна, облустук прокуратурага жана Талас облусундагы президенттин ыйгарым укуктуу өкүлчүлүгүнө расмий суроолор жиберди.
ГИКтен келген жоопто компания курулуштун заказчысы экендиги, ал эми курулуш иштерин мамлекеттик "Кыргызстройсервис" ишканасы жүргүзүп жатканы маалымдалды. Текшерүүнүн жүрүшүндө мурда бул объект менен башка компания иш алып баргандыгы, ал долбоордон чыгып кеткенден кийин подряддык милдеттенмелер жаңы аткаруучуга өткөрүлгөнү аныкталды.
Институттун кайрылуусунан кийин, учурдагы подрядчы жергиликтүү жашоочуларды жумушка орноштуруу мүмкүнчүлүгүн карап чыгууга макул болду, эгерде алар квалификация жана тажрыйба талаптарына жооп берсе.
Февралдын башында арыз ээлери кайра жумушка алынганын билдиришип, акыйкатчыга көрсөтүлгөн жардам үчүн ыраазычылык билдиришти.
