Саламаттык сактоо министрлигинин маалыматына ылайык, министр визитинин алкагында Улуттук госпиталдын жедел жардам бөлүмүн текшерип, учурда ремонт жүрүп жаткан объектилерди карап чыкты.
Нацгоспиталдын башкы дарыгери Бакыт Тологонов реанимация бөлүмүнүн ремонту аяктап жатканын, ал эми референс-лабораториянын имаратын жаңылоого байланыштуу иштер апрель айынын аягына чейин аякталат деп белгиледи.
Референс-лабораторияны түзүү Азия өнүктүрүү банкынын колдоосу менен ишке ашырылып, шаардагы стационарлар үчүн борборлоштурулган лабораториялык базаны түзүүгө багытталган. Бул Улуттук госпиталга башка шаардык стационарлар үчүн лабораториялык изилдөөлөрдү борборлоштурулган түрдө жүргүзүүгө мүмкүндүк берет, бул диагноздун сапатын кыйла жогорулатат жана изилдөөлөрдүн бирдиктүү стандарттарын киргизет. Проект бир жыл бою ишке ашырылууда, ремонт аяктагандан кийин жаңы жабдуулар орнотулат жана персоналды окутуу жүргүзүлөт, бул лабораторияны толук көлөмдө ишке киргизүүгө мүмкүндүк берет.
Мындан тышкары, министр жедел жардамдын борбордук бөлүмүнүн иши менен таанышып, ал 1,5 жылдан ашык убакыттан бери ийгиликтүү иштеп жатканын белгиледи. Визит учурунда бөлүмдүн ишин жакшыртуу үчүн багыттар аныкталды: шок бөлмөсүн түзүү, бөлүмдөрдү кошумча жабдуулар менен камсыздоо жана реанимациядагы бейтаптар үчүн туруктуу ЭКГ мониторингин уюштуруу.
Визитинин аягында министр Кыргызстандын адам репродукциясы боюнча илимий борборуна барып, мекеменин жетекчилиги учурдагы ишмердүүлүгү, бар ресурстары жана репродуктивдик ден соолук тармагындагы көйгөйлөр тууралуу маалымат берди.
Визиттин жыйынтыгы боюнча министр борбордун жетекчилигине энеликти коргоо жана мекеменин илимий потенциалын күчөтүү боюнча конкреттүү сунуштарды иштеп чыгуу тапшырмасын берди.
