Ведомство билдиргендей, эми документтерди тапшыруу процесси борборлоштурулган. Мурда талапкерлер ар бир мамлекеттик органга кайрылып, арыздарын тапшырып, конкурс күтүшү керек болчу. Эми болсо жарандар документтерин бир жолу тапшырып, тандоонун жыйынтыгы боюнча бирдиктүү борборлоштурулган кадрдык резервге кире алышат.
«Бул бардык мамлекеттик органдарда жана жергиликтүү өз алдынча башкаруу органдарында кичи административдик кызматтарга талапкер болуу мүмкүнчүлүгүн түзөт, ар кандай конкурстарга кайра катышуунун зарылдыгын жок кылат. Жаңы механизм кадрдык саясаттын ачык, жеткиликтүү жана натыйжалуу болушун жогорулатууга, ошондой эле мамлекеттик кызматта иштегиси келген жарандар үчүн мүмкүнчүлүктөрдү кеңейтүүгө арналган», — деп белгиленет мамлекеттик агенттиктин билдирүүсүндө.
Ведомствонун маалыматына ылайык, арыздарды кабыл алуу электрондук форматта мамлекеттик E-Kyzmat порталынан жүргүзүлөт, бул бирдиктүү жана ачык тандоо тартибин камсыздайт.
Рейтингдик система талапкерлерди жыйнаган баллдар негизинде баалоо үчүн колдонулат, ал эми эң жогорку баллдарды алган талапкерлер бош кызмат орундарын ээлөөгө артыкчылык алышат.
Кадрдык резервге кирүү үчүн үч этаптан өтүү зарыл: документтерди тапшыруу, нормативдик укуктук актылар боюнча компьютердик тестирлөө жана онлайн же офлайн форматында интервью.
Бардык этаптарды ийгиликтүү аяктаган талапкерлер үч жылга резервге киргизилет. Конкурстун жыйынтыгында 5 миңге чейин адамды резервге алуу пландалууда.
Документтерди кабыл алуу 2-марттан 6-мартка чейин жүргүзүлөт. Кененирээк маалымат www.gov.kg сайтындагы «Вакансиялар» бөлүмүндө жана мамлекеттик E-Kyzmat порталында жеткиликтүү.
