Садыр Жапаров бул кызматташтык өлкөдөгү жарандык авиацияны жакшыртуунун, жүк ташуунун ишенимдүүлүгүн жогорулатуунун, учуулардын коопсуздугун камсыздоонун жана авиакаттамдарды кеңейтүүнүн маанилүү кадамы экенин белгиледи.
Президент авиация тармагы динамикалуу өнүгүүнү көрсөтүп жатканын, аэропорттордун инфраструктурасын модернизациялоону жана регионалдык маршруттарды кеңейтүүнү эл аралык стандарттарга ылайык жүргүзүп жатканын айтты.
«Буга чейин бизде төрт аэропорт иштеп жаткан болсо, бүгүнкү күнү 11 аэропорт иштеп жатат, ошондой эле Жалал-Абадда эл аралык аэропорттун курулушу уланууда», - деп кошумчалады ал.
Мындан тышкары, мамлекет башчысы Кыргызстан Европалык Союздун авиация коопсуздугу боюнча «кара тизмеден» чыгарууга жакын экенин, акыркы аудит ушул айга пландалганын билдирди. Бул жагдайда Садыр Жапаров компаниялардын жетекчилерине бул процессте колдоо көрсөтүүнү сунуштады.
Йохан Пелиссье, өз кезегинде, Кыргызстандын авиация тармагын модернизациялоодогу жетишкендиктерин оң баалады жана транспорттук жана логистикалык аспекттерди камтыган узак мөөнөттүү кызматташууга кызыгуусун билдирди.
«Биз Кыргызстан Евросоюздун аудитин аяктап жатканын кубануу менен билдик жана керектүү колдоону көрсөтүүгө даярбыз», - деп белгиледи ал.
BBAM Leasing компаниясынын улук вице-президенти Морис Прендергаст жаңы учактар эл аралык стандарттарга толук жооп берерин жана компаниянын адистери кыргызстандык кесиптештерине жаңы аба кемелеринин операциялык системаларын жана техникалык өзгөчөлүктөрүн үйрөнүүгө жардам берерин кошумчалады.
Жыйынтыгында, тараптар өз ара пайдалуу жана натыйжалуу кызматташтыкты улантууга даярдыктарын бекитишти.
